Iranian tanker-in Gibraltar chhuahsan; Adrian Darya-1 tiin a hming thlak

Iranian oil tanker 'Grace 1' chuan nimin khan Gibraltar port a chhuahsan.

'Grace 1' hian Mediterranean tuipui chhak lam panin Greece-a Kalamata a pan dawn nia tarlan a ni bawk. US chuan 'Grace 1' man phalna hi a pechhuak tawh a, kar hmasa Zirtawpni khan  Gibraltar hnenah hian hreng rih turin ngen mah se Gibraltar hian US ngenna hi hnawlin a chhuah zalen tho a ni.

'Grace 1' hming hi 'Adrian Darya-1' tia thlak zui a ni bawk a, 'Grace 1' tih inziak chu thaichhiain  'Adrian Darya-1' tih an ziak tawh. July thla khan Syria ramah dan loa fuel phur lut nia rinhlelh avangin man a ni a, mahse Gibraltar hian Zirtawpni liam ta khan US-in hreng rih tura a ngen chungin chhuah phalna hi a pe ta tho a ni. Gibraltar chuan US-in Iran a hrekna chu European Union-ah hman theih a ni ve lo nia sawiin an chhuah. Tehran lam chuan 'Adrian Darya-'1 vengtu tur tirchhuak turin an inpeih tih an sawi nghal bawk.

Mi 29 chuanna Iraninan oil tanker hi July 4 khan British marine-te chuan an man a, hemi hnu hian UK leh Iran boruak hi a chhe zui hle. Iran lam hian British flag intarna, Swedish oil tanker 'Stena Impero' chu Gulf-ah hian a man zui ve bawk a ni.

Gibraltar thuneitute chuan Ningani liam ta khan Iran hnen aṭang hian thu dawngin, oil tanker hian a bungraw phurh chu Syria-ah a dah dawn lo tih an hrilh hnuah chhuah tur hian thutlukna an siam zui. 

US justice department chuan ngenna siam nghalin oil tanker leh firfiak pawl Iran Islamic Revolutionary Guard Corps-te chuan inzawmna an nei tih sawiin, hreng rih turin an ti a, mahse Gibraltar hian a hnawlsak ta a ni.

Hetihlai hian Iran-in an mansak British flag awmna oil tanker chu hren zui a la ni a, mahse 'Grace 1' chhuah zalen a nih takah chuan 'Stena Impero' pawh hi chhuah zui a nih ve rin a ni thung.