Prince William-te nupain Pakistan zin tur ṭhulh mai thei
Britain lal fapa, Prince William leh a nupui Kate Middleton-ten Pakistan tlawh an tum chu tunhnaia Pakistan leh India inkar boruak ṭha lo avangin an ṭhulh mai thei nia sawi a ni.
Britain Foreign and Commonwealth Office ngenna angin Duke leh Duchess of Cambridge-te hian kumin chhungin Pakistan hi an tlawh dawn tih June thla khan royal family thuchhuah chuan a lo tarlang tawh a ni. Mahse Jammu and Kashmir chungchangah India leh Pakistan hi an inep nat chhoh avangin an zin tur hi ngaihtuah nawn leh a ni dawn niin report ṭhenkhat chuan a tarlang.
Prince William leh Kate-te hi an zin a nih chuan, kum 2006 hnuah British royal family zinga Pakistan tlawh leh hmasa ber an ni ang. Kum 2006 khan Prince Charles leh Camilla-te chu an lo zin tawh a ni. Kum 1961 leh 1997 khan Queen Elizabeth II chuan Pakistan hi a lo tlawh tawh a, Princess Diana pawhin kum 1991 khan a lo tlawh tawh bawk.