Bangladesh-in Rohingya 3,000-te an rama thawnkir dan ngaihtuah

Bangladesh sorkar chuan an rama Rohingya Muslim raltlan awm zinga 3,000 chu Myanmar rama thawn kir an nih theihna turin United Nations refugee agency a thawhpui dawn. 

Kum 2017 August thlaa Myan­mar sipaiten Rakhine state-a beihpui an thlak avang khan Bangladesh-ah hian Rohingya mi nuai sarih chuang zet an tlanchhia a ni. Bangladesh leh Myanmar sorkar hian raltlante hruaikirna tur hian nikum khan inremna an siam a, mahse tun thlengin kir duh an la awm lo. 

Bangladesh refugee relief and repatriation commissioner, Abul Kalam chuan UN agency kaih­hruainain raltlante hruai kir hna hi kalpui a ni dawn tih a sawi. Vawiin hian UN Security Council chuan France, Britain, United States, Germany leh Belgium-te ngenna angin Rohingya-te hruaikir chungchangah hian closed door meeting a nei dawn bawk. 

Myanmar sorkar thupuangtu, Zaw Htay chuan Bangladesh-in raltlante hming 22,000 a pek aṭangin, mi 3,450 chu Myanmar rama an kir theihna tur tihfel a ni tawh tih a sawi. Bangladesh hnenah pawh heng mite hruaikirna tur hi pawm tura ngen a ni tawh a, group pasariha ṭhena hruai kir tum an ni, a ti. 

Ram pahnih official-te chuan raltlante hi ni khatah mi 300 zel hruai kir an tum a ni. Hemi rual hian raltlante hi tumah nawr luih an ni dawn lo a, kir duha inpete chauh hruai an ni ang, tiin Kalam chuan a sawi.