Sudan president hluiin Saudi hnen aṭangin USD mtd 90 dawng
Sudan president hlui Omar al-Bashir chuan Saudi Arabia lal hnen aṭangin USD mtd 90 a dawng tih police investigator-te chuan Khartoum court-ah an thlen.
Thawhṭanni khan Omar al-Bashir corruption case hi Khartoum court-ah ngaihtuah a ni a, Bashir hian pawisa a dawn hi mimal hman tur atan a nih thu leh Saudi Arabia Crown prince Mohammed bin Salman palai pek a nih thu a sawi.
Omar hi dan lo anga ramdang pawisa laluta puh a nih thu sawiin, Brigadier General Ahmed Ali chuan Bashir chenna inah hian euro mtd 7 hmuh a ni a, US dollar leh Sudanese pound-te pawh hmuh a nih thu a sawi bawk.
Prince Mohammed bin Salman pawisa thawn USD mtd 25 hi state budget piah lama hman a nih thu Ahmed Ali chuan a sawi. Omar hian kum 2015-a thi ta Saudi Arabia lal Abdullah hnen aṭangin ṭum hnih ngawt USD mtd 35 leh mtd 30 a dawn tawh thu police investigator-te chuan an sawi.
Bashir chuan investigator-te hnenah Saudi pawisa chu engtiang chiaha hman nge a nih a hriat chhuah zawh tawh loh thu a hrilh. Bashir-a lawyer chuan pawisa hi president a nih tawh loh hnua a hmuh a nih avangin thu tling tawk loah a ngaih thu court a hrilh. Inrinni hian court hearing neih chhunzawm leh a ni ang.
Kumin April 11 khan sipai chakna hmangin Transitional Military Council (TMC)-te chuan Sudan President hlui Omar al-Bashir hi an paihthla a, sipai sorkar an siam zui a ni. Tunah chuan Sudan-ah hian mipui sorkar a awm theih nan hma lak mek a ni a, hemi kawngah hian Alliance for Freedom and Change (AFC), Sudanese Professionals Association (SPA) leh sipai hruaitute an indawr mek a ni.