China-in BBC channel tihchhuah khap

China chuan an ramah British television channel, BBC World News tihchhuah a khap. 

China media regulator,  National Radio and Television Administration (NRTA) chuan nimin khan thuchhuah siamin, BBC World News-in China kaihhnawih thila report a tihchhuah chu thu dik tawk lo nia sawiin, dan a bawhchhia a ni, a ti. Thuchhuahah hian chanchinthar tihchhuahte chu belhchian dawl leh thil dik tak a ni tur a ni tiin, he channel hian China rama foreign channel tihchhuah tura dan siamte a zawm lo a, hei vang hian kum khat chhung chu tihchhuah a dilna pawmsak a ni dawn lo, a ti. 

China rama TV channel package tam zawkah BBC World News hi telh a ni lo. International hotel leh diplomatic compound-ah chauh pek chhuah phal a ni. BBC chuan China sorkar thutluk­na siam chu pawi an tih thu sawiin, BBC chu international news broadcaster rintlak ber a ni a, khawvel ram hrang hrang report an tihchhuahte chu dik tak, tumah duhsak bik leh tlawn bik nei loa an tihchhuah ṭhin thu an sawi. 

BBC hian February 3 khan China khawthlang lam, Xinjiang khuaa camp-a Muslim Uighur hmeichhiate chu nghaisak leh mipat hmeichhiatna lam hawia khawih an ni ṭhin nia sawi chungchang report a tichhuak a, he thil hi witness hrang hrangte an kawmna behchhana an siam a ni tih BBC chuan a sawi. Hei hian China thuneitute a tilungawi lo hle a ni. 

China-in BBC channel tihchhuah a khap hma, kar liam ta khan British media regulator, Ofcom chuan China sorkar ta, China Global Television Network's (CGTN) chu UK-a tihchhuah a nih tawh lohna nan a licence a lo tihtawp sak a ni. Ofcom chuan tele­vision license pek hi dik lo takin Star China Media Ltd in a kawl niin a sawi a, hei bakah hian UK mi leh sa Peter Humphrey inpuan luih tirna tihchhuah chuan British broadcasting regulation a bawhchhia niin a sawi bawk. 

China sorkarin BBC channel tihchhuah a khap hi Britain leh US chuan an sawisel nghal a, Britain foreign minister Dominic Raab chuan media freedom rahbehsakna a ni, a ti. US pawhin an dem thu sawiin, China chu a ram chhunga media-te thununah a puh bawk.