Myanmar : Nawrh huaihawt zinga pathum hliam

Myanmar sipaiten an hren mek, Aung San Suu Kyi leh political leader dangte thlawpna lantirin nimin khan democracy thlawptute chuan khawpui hrang hrangah nawrh an huaihawt chhunzawm leh. Mawlamyine khuaa nawrh huaihawte chu police-ten rubber bullet-a kapin, an zinga pathumin hliam an tuar. 

Khawpui hrang hrangah nawrh huaihawt hi boruak ṭha tak hnuaiah  neih a ni a, mahse chhimchhak lama Mawlamyie khawpuiah erawh chuan pungkhawmte leh police-te an innawr  buai. Pungkhawmte hian police-te chu lungin an tawng a, police lam hian rubber bullet-in an kap let ve bawk a, mi pathumin hliam an tuar a, an zinga pakhat chu hmeichhia a ni. 

Myanmar Red Cross official Kyaw Myint chuan sipai chakna hmanga civil sorkar thuneihna hnehchhuh duh lohna lantirna hi a lian chho zel niin a sawi. A zawnin ni sarih chu khawpui hrang hrangah nawrh huaihawt a ni tawh. Civil sorkar paihthla a, thuneihna chelh mektu Army chief General Min Aung Hlaing chuan nawrh huai­hawt mek thlawptu, sorkar hnathawk hrang hrangte chu an hna thawk chhunzawm tawh turin a ti.

Gen Hlaing chuan thuchhuah siamin, mi ṭhenkhatte fuihna avangin sorkar hnathawkte tam tak chuan an hna pawh thawk loin an awm niin a sawi a, heng mite hi an hna lamah kir tawh tura tiin, hna zawm lote chungah action lak a ni tur thu a sawi. Hetih lai hian nawrh huai­hawttu pawl ṭhenkhat chuan sorkar hnathawkte chu an hna boycott rih tura ngenin, Suu Kyi leh hruaitu dangte chhuah an nih theihna tura sorkar nawrpui turin an ngen.