Trump impeachment : Senate-ah thiam loh chantir tumna a hlawhchham
US President hlui, Donald Trump-a impeach tumna chu a hlawhchham ta.
Democrats lamin kumin January 6-a Capitol-a buaina chhuak kaihhnawiha President hlui Trump impeach an tumna chu, Senate-a thiam loh chantir tura vote hmuh ngai zat, hmun thuma ṭhena hmun hnih an hmuh phak tak loh avangin Trump chu thiam loh chantir a ni ta lo.
An ram huna kar liam Inrinnia Senate-a vote lakah Trump thiam loh chantir duh lamah vote 57 tlain, impeach duh loh lamah vote 43 a tla a ni. Republican senator zinga pasarihin Democrats lam hi pui mah se, Trump thiam loh chantir tur vote hmuh ngai zat, vote 67 an hmu pha ta chuang lo a ni.
President hlui Trump hian impeachment a hmachhawn ṭum hnihna a ni. US President ni tawh zingah impeachment trial vawi hnih hmachhawn awmchhun a ni. Senate-a Trump thiam loh chantir tumna a hlawhchham ta chu Democrats lamin na takin an sawisel zui a, Senate majority leader Chuck Schumer chuan Trump-a'n thiam a chang ta chu pawi a tih thu leh, Senate vote pek dan chu an ram hmangaihtu mipuite zah lohna lian tak a ni, a ti.
"President hlui hian boruak ṭha tak hnuaia thuneihna inhlanchhawn tur dang a, tharum thawh zawnga che chhuak turin a fuih a ni," a ti. Hetih lai hian Trump chuan impeachment trial a hmachhawn ṭum hnihnaah pawh hnehna a chang leh tih sawiin, a hmalakna 'Make America Great Again' pawh a inṭan chho leh chauh a, America ropuina nei let turin beih chho leh chu a nghakhlel hle tih a sawi.