Italy PM thar Mario Draghi lalut

European Central Bank (ECB) president hlui Mario Draghi chu kar liam ta Inrinni khan Italy prime minister thar atan lakluh a ni.

Mario Draghi hi kumin February 3 khan an ram presi­dent Sergio Mattarella chuan sorkar thar siam turin a sawm a, League party, Five Star Movement leh Democratic Party-ten an thawhho theih tur thu an tihchian hnuah February 13 khan Mario Draghi hi Italy PM ni turin Quirinal presidential palace-ah lakluhna inkhawm neihpui a ni ta a ni.

PM thar hian cabinet minister thar 23 a ruat nghal a, Five Star Movement (M5S) party hotu Luigi Di Maio chu Minister of Foreign Affairs atan ruat a ni a, Interior Minister atan Luciana Lamorgese, Health Minister atan Roberto Speranza, Defense Minister atan Lorenzo Guerini, Economy and Finance Minister atan Daniele Franco, Minister for Economic Development atan Giancarlo Giorgetti, Vodafone Group CEO hlui Vittorio Colao chu Minister for Technological Innovation and Digital Transition atan a ruat a ni. Anni bakah cabinet ruat thar midang an awm bawk.

Heng cabinet-te hi tunkar chho hian senate leh lower house-ah vote of confidence an hmachhawn dawn a ni. PM tharin a tihtur pawimawh ber chu European Recovery Fund an hmuh, an ram economy siamṭhat nana hman a ni. 

Nikum lama Covid-19 hri leng an tawrh nasat vangin Italy hi an ram ei leh bar (economy)-ah an tlachhe hle a, hei vang hian prime minister kalchhuak ta Giuseppe Conte kaihhruai sorkar chuan sawisel a tawh phah nasa hle.

Covid-19 hri leng vangin Italy hian nikum July thla khan an ram economy siamṭhat nan European Recovery Fund aṭangin grant leh loan-in Euro tluklehdingawn 209 lai a la a ni. He an fund dawn leh loan an lak hi Conte kaihhruai sorkar chuan an hmang dik lo nia puh a ni a, hei vang hian kumin January thla khan sorkar lai thlawhpu Italy PM hlui Matteo Renzi kaihhruai Italia Viva party chuan sorkar an thlawpna an titawp a ni. Heng bakah hian PM hlui Renzi chuan Conte-a'n secret services coordination task a kaihhruai dan chungchang tarlang turin Conte hi a phut a, mahse Conte hian a tarlang zui ta lo. 

Viva party-in sorkar lai an thlawpna an tihtawp avangin, Italy parliament-ah Conte hian vote hmanga fiahna a paltlang a ngai a, Chamber of Deputies-ah Conte duhtu lamah vote 321 a tla a, duh lo lamah vote 259 a tla thung. Senate-ah pawh vote lak niin, a duh lamah vote 156 a tla a, duh lo lamah vote 140 a tla bawk. 

Amaherawh chu, Conte hian absolute majority a hmuh a ngai a, a hmuh phak loh avangin Prime Minister a nihna aṭangin kumin January 26 khan Conte hi a bang zui ta a ni.