Indonesia-in West Papua-ah sipai tir

Indonesia chuan West Papua biala buaina a punlun zel avangin nimin khan sipai a tirh belh. 

Kar kal ta khan Papua zirlai, Java island-a awmte chu Indonesia Indepen­dence Day lawm laiin Indonesia flag chu lo thlep tawm a, bawlhhlawh paihna hmuna paiha puh an nih vangin man a ni. Zirlai an man hi 43 an ni a, police officer-te chuan an man hma hian zirlaite hi 'zawng' ti tein an au nia sawi a ni. 

Papua zirlaite chunga thil thleng duh lo hian Thawhṭanni khan West Papua-ah lungawi lohna lantir ṭan a ni. Zirlaite chunga police-te chet dan an dem thute an sawi. Nawrh huaihawtte hian local parliament building-te an hal a, kawngpuite an dang bawk. Airport leh sorkar building-te an khawih tel bawk. 

Buaina hi a punlun zel a, nawrh huaihawtte hian kawng­zawh lian tham zawk buatsaih chhunzawm an tum avangin sorkar chuan nimin khan sipai hi a tirh belh a ni. Police-te chuan buaina hi an thunun tawh tih sawi mah se, nimin thleng khan lungawi lohna lantir chhunzawm reng a la ni. Indonesia sorkar chuan buaina nasa zawk a chhuah venthawn thilah West Papua hmun hrang hrangah internet a titawp. Hei hi security thil vang chauha ti an ni tih communications and information minister Rudiantara chuan a sawi. 

West Papua hian hun rei tak aṭangin Indonesia lak aṭanga inlakhran an lo tum tawh a ni. Kawngzawhnaah pawh hian Indonesia lak aṭanga zalenna an duh thu an aupui nasa hle.