Kum 3 kal ta aiin tunah ISIS an chak zawk : Mike Pompeo

US Secretary of State Mike Pompeo chuan Thawhlehni khan Islamic State (IS) firfiak pawl chu hmun ṭhenkhatah kum thum kalta ai chuan an chak tawh zawk thu a sawi. Mahse a huhoa midang bei tur chuan an chakna a tlakhniam thu a sawi thung.

Nikum December khan US President Donald Trump chuan US sipaite'n Syria rama IS firfiakte laka beihpui an thlak chu an hlawhtling hle tih sawiin, heng ramah hian US sipaite awm zui zel pawh a ngai tawh lo a ni, a ti. Pompeo chuan ram 80-ah Islamic hel pawlte lakah hian beihpui thlak a ni a, an  hlawhtling hle tih a sawi. 

Hetihlai hian Chinese official chuan IS te hi Syria-ah an rawn intuaithar leh a hlauhthawnawm thu sawiin, firfiakte indinthar lehna tur kawng siam sak lo tura ngenin, Syria sorkar leh eptu pawlte indo pawh titawp turin a ngen a ni. 

Afghanistan khawpui Kabul-a kar kal ta Inrinni a inneihna hmuna suicide bomb hmang a mi 63 an thihna leh mi 182 in hliam an tawrhna thleng kha IS firfiak pawl chuan an tih a nih thu an sawi.