Venezuela President-in US inbiakna neihpui
Venezuela president Nicolás Maduro chuan US President Donald Trump kaihhruai sorkar nen inbiakna an neih thu a sawi.
Nicolás Maduro chuan US sorkar nen chuan thla khat vel zet inbiakna an kalpui tawh tih sawiin Trump pawhin Thawhlehni khan Venezuala aiawh leh US sorkar chuan inbiakna an nei ngei tih a sawi ve bawk.
President Trump chuan tute nge inbia tih erawh a sawilang duh lo a, mahse high level-ah inbiakna an nei tih a sawi thung.
Engatinge an inbiaknain ngaihven a hlawh?
Venezuela president Nicolás Maduro hi ram 50 chuang zetin Venezuala President-ah hian an pawm lo a, chung zingah chuan US pawh hi a tel a ni.
US hian Venezuela eptu pawl National Assembly hruaitu Juan Guaidó chu thlawpin, kumin January thlaa interim president-a a inpuanna pawh kha a pawmpui. Mahse ram 50 chuangin an thlawp chung hian Guaidó hian Maduro hi a paihthla thei lo.
US chuan Venezuala hi hrekin an ram hruaitu ṭhenkhatin US-a an thil neihte chu khawih chet theih lohin a dahsak hial a ni. Venezuala tualchhung buaina vang hian an ram hian economic lamah harsatna tam tak an tawk zui a, an ram mipui hmun thuma ṭhena hmun khat chuan chhawmdawlna an mamawh niin UN pawhin a lo puang tawh.
Venezuala mi maktaduai li chuang chuan kum khat liam ta chhung khan an ram an chhuahsan tawh bawk.