Sudan PM thar atan Hamdok lalut

Sudan chuan hun rei tak buaina an hmachhawn hnuah Nilaini khan prime minister thar atan Abdalla Hamdok an lalut.

Abdalla Hamdok hian kum thum chhung PM dinhmun hi a chelh dawn a, civil kuta rorelna hlan let a nih hma, transitional year an tih, kum thum chhung atana an ram hruaitu tur hian an ruat an ni. PM thar chuan remna leh muanna awmna tur leh an ramin economic lama harsatna a tawh mek sutkian chu a ngaihpawimawh ber a nih tur thu a sawi. 

Thawhlehni khan Sudan hian 'Sovereign Council' thar din a nih thu leh, he council-ah hian civil aiawh paruk leh sipai aiawh panga an awm thu an lo tarlang tawh a, council hotupa atan hian Lt-Gen Abdel Fattah Abdelrahman Burhan ruat a nih thu an lo tarlang tawh bawk.

Sudan sorkar thar hian ramin inthlanpui an hmachhawn hma chu ro an rel dawn a, nikum kumtawp lam aṭanga buaina nasa tak an hma­chhawn hnua sorkar thar a piang thei hi Sudan mipuite tan chuan thu lawmawm tak a ni ngei ang. Sudan ram buainaah hian mi 250 vel zetin nunna an chan tawh a ni. 

PM thar Abdalla Hamdok hi United Nations Economic Commi­ssion for Africa (UNECA)-a Deputy Executive Secretary ṭhin a ni a, 2011 aṭang khan he hna hi chelhin nikum khan a bansan a ni. University of Khartoum aṭanga BSc zoin University of Man­chester aṭangin doctorate in economic studies a hmu bawk.

Nikum khan Sudan president paihthlak tak Omar al-Bashir khan finance minister atan a 'nominate' a, Hamdok hian a hnial thung. Mahse tunah erawh Sudan PM 15-na ni turin Nilaini khan an lalut ta a ni.