INF aṭanga inhnuhdawh chhanah Russia leh US inpuhtawn

Cold War-era nuclear arms treaty aṭanga US a inhnuhdawh hnuah ralthuam siam lamah US leh Russia chu an intlansiak leh ṭan ta niin a lang a, hemi kawngah hian Ningani khan UN meeting-ah US leh Russia chu mawhphurtuah an inpuh tawn. 

Tun thla tirah khan US leh Russia ten Cold War hunlaia medium-range missile siam lo tura inremna an siam, Inter­mediate-Range Nuclear Forces (INF) treaty an hnawl hnu khan ram lian pahnih hian ralthuam an enchhin leh ta zeuh zeuh a ni. Ningania UN meeting-ah khan hemi chungchang hi sawichhuah a ni a , US chuan Moscow-in ralthuam a siam chhunzawm zel avanga inhnuk­dawk an nih thu a sawi.

Deputy Russian Amba­ssador to the UN Dmitry Polyanskiy chuan America chu INF treaty ṭum eng emaw zat bawhchhe tawhah puhin, August 18-a medium-range ground-launched cruise missile an enchhin khan hei hi a tichiang hle a ni, a ti. US chu ralthuam siam lama intlansiak leh turin a inpeih hle a ni, a ti bawk.

Hetihlai hian US aiawh Jonathan Cohen chuan Russia chu hun rei tak aṭang tawh khan INF bawhchhe tur hian a inpeih tawh tih a sawi ve thung. China UN ambassador, Zhang Jun chuan US leh Russia chu ralthuam siam lo tura inremna siampui tumna an nei tawh lo tih a sawi ve bawk.