Amazon ram kang International emergency a nih thu France President-in sawi

France President Emmanuel Macron chuan Ningani khan Bra­zil-a Amazon ram kang chu inter­national emergency a nih thu a sawi a, kumin August 24–26 a Biar­ritz, France-a G7 summit a neih turah sawiho turin a ngen bawk. 

Macron chuan a Twitter-ah,"Khawvela oxygen 20% chu Amazon ramngaw aṭanga insiam a ni a, he ramngaw kan vang hian khawvel pumpuiin harsatna a tawk a ni. G7 member zawng zawngte'n kan ngaihven a ṭul mai bakah kan hma lawka G7 Summit neih turah sawi ho a ngai a ni," a ti.

Amazon ramngaw hi khaw­vela tropical forest zau ber a ni a, square km maktaduai 5.5 a zau a ni. He ramngaw hian hlutna tam tak a nei a, rangkachak, copper, tantalum, iron ore, nickel leh manganese lamahte a ram leilung hi a hausa hle a, mahse tunah hian a kang chhe mek a ni. 

Amazon ramngaw hian ram 9 a tan tlang a, chungte chu Bolivia, Brazil, Colombia, Ecuador, French Guiana, Guyana, Peru, Suriname leh Venezuela-te an ni. Brazil ram 60% chu Amazon ram ngaw hian a tuam. He ramngawa sq km mtd 2.1 chu bio­diversity sanctuary atan humhalh bik a ni a, khawvel ramsa species chi hrang hrang hmun lia ṭhena hmun khat chu he ramngawah hian an awm a ni. Chung zingah chuan thlai chi hrang hrang 30,000, sangha 2,500, sava 1500, mammal 500, reptile 550 leh insect chi hrang mtd 2.5 zet an awm bawk.

Amazon ramngaw chhunga Amazon lui hi khawvela lui lian ber a ni a, kilometer 6,400 a sei a ni. World Wildlife Fund (WWF) tarlan danin, he ramngaw chhah tak hian boruaka carbon dioxide tonne vaibelchhe 90-140 chu lo hip lutin mihringte mamawh oxygen a pe chhuak ṭhin a ni. Mahse ramngaw tih chereu ṭhin a nih avangin carbon dioxide a hip luh chak theihna hi a tla hniam ve zel bawk a ni.

WWF chuan, Amazon ramngaw hi kum 50 chhungin 20% vel chu a chhiat tawh thu an tarlang. Kumina Brazil president Jair Bolsonaro lakluh a nih hnu aṭanga July thleng khan nikum nena khaikhin chuan ramngaw hi a let li zeta tihchhiat nasat zawk a nih thu DETER thawhpui National Institute for Space Research (INPE) chuan an tarlang bawk.

INPE tarlan danin, Brazil-ah kumin January-August thla chhung khan hmun 73,000-ah ram a kang a, kum 2013 hnulama a kan nasat ber ṭum a ni. Ram kang tam ber hi Amazon hmunah a ni bawk.