Sri Lanka-in emergency titawp

Sri Lanka sorkar chuan kumin Easter Sunday-a biak-in pathum leh hotel pathuma bomb puak vanga mi 258-in nunna an chan hnua rampuma emergency a puan chu nimin khan a titawp ta. 

April 21-a Islamist firfiak­ten Colombo khawpuia pawi­khawihna an thlen hnuah president Maithripala Sirisena chuan thla khat chhung atan emergency hi a puang zui a, mahse a hnuah pawtsei zelin thla li chhung an hmang zui a ni. Mahse Ningani khan President office chuan emergency hi pawhsei chhunzawm a ni tawh dawn lo tih a sawi.

Emergency puan chhung hian police leh security force-te chu pawikhawihnaa inhnam­hnawiha rinhlelhte an zawnna kawngah thuneihna sang tak pek an ni. Police-te chuan Easter Sunday-a pawikhawihna thlenga inhnamhnawihte chu man an ni vek tawh tih sawiin, man lohte pawh an thi tawh tih an sawi a ni. Hemi rual hian intelligence lam aṭangin Islamist firfiakten pawikhawihna thlen an tum thu dawn a ni chunga hma lak a nih dante chhui chian mek a ni. 

President Sirisena hi Indian intelligence-ten firfiakten Kris­tian-te biak-in beih an tum thu an hrilh chunga venhim­na lam kalpui kawnga hlawhchhamah puhin sawisel a tawk fo a ni.