Rohingya raltlanten nawrh an huaihawt

Bangladesh-a Rohingya Muslim raltlante chu nimin khan Myanmar ram aṭanga an tlanchhiatna champha vawi hnihna pualin nawrh an huaihawt a, Myanmar sorkar hnenah khua leh tui nihna leh an dikna chanvo dangte pe turin an phut. 

Kum 2017, August thlaa Myanmar sipaiten Rakhine state-a Rohingya-te laka beihpui an thlak avangin mi nuai sarih chuang chu Bangladesh ramah hian an tlan­chhia a, refugee camp-ah an la khawsa a ni. Bangladesh leh Myanmar sorkar chuan raltlante Myanmar rama hruaikir leh an nih theihna tur hian inremna pawh an siam tawh a ni. UN refugee agency puihnain Myanmar-in Rohingya mi 3,450 hruai kir a remtihte chu Ningani khan a ṭum hnihna atan hruai haw tum an ni. Mahse list-a tel tumah Myanmar rama kir duh an awm lo. Nikum November thla khan raltlante hi hruai kir tum an lo ni tawh bawk a, mahse hemi ṭum pawh hian kir duh an awm lo a ni.

Nimin zing khan Rohingya raltlan 3,000 chuang chu Kutupalong camp-a play­ground-ah kalkhawmin, an dikna chanvo pek an duhna thuziakte an keng. Myanmar sipaiten Rohingya-te chenna hmun an beih ṭuma sipai kut tuara thi te, pawngsual leh hal tawkte tana ṭawngṭaina hunte an hmang bawk. Buaina a chhuah palh venthawn thilah refugee camp hrang hrangah venhimna tihkhauh a ni. 

Bangladesh police-te chuan Inrinni khan refugee camp a silai inkahna thlengah Rohingya raltlan pahnih an kap hlum. An kahhlum chhan hi ruling party official an thah vang a nih thu Police lam chuan an sawi. 

Police inspector Rasel Ahmad chuan an kah hlum tak pahnihte hi damdawi-in pan pui nghal an nih thu a sawi a, he inkahna hi Cox Bazar district-a Jadimura refugee camp-ah a nih thu a sawi bawk. Ahmad chuan Ningani khan Awami League party official Omar Faruk chu, Teknaf ramri hrulah a luah kapin, ka pawh chhawn loin a thih zui nghal thu a sawi a, he thil titute hi refugee sipaite an nih ringin, a titute dapchhuah hna an thawhnaah police-te nen hian inkapin; Rohingya raltlan pahnihte hi Bangladesh poilce-ten an kap hlum ta ni, a ti. 

Rohingya pahnih thah an nih avang hian raltlante an lungawi lo hle a, hmun ṭhenkhatah duh lohna lantirin, motor kete an hal a, dawr leh thil hrang hrang an ti chhe nual bawk a ni. Inrinnia Bangladesh police-te'n Rohingya pahnih an thahte hi Faruk thattute zinga inhnamhnawih an nih thu Ahmad chuan a sawi.