Israel-in An ram beih tumtu Iran drone kapchhia

Israel thlawhtheihnate chuan Inrinni zan khan Syria aṭanga an ram beih tumtu, Iran drone an kahchhiat sak tih an sawi. 

Israel Defence Forces chuan Damascus chhim­chhak lam, Aqraba khuaa Iran Quds Force leh an thurualpui helten Israel beihna tura 'killer drone' an buatsaihna hmun chu an kapchhia tih a sawi. Syria state media Sy­rian air defence-te chuan Israel-te beihna hi lo chhang letin, Israel missile tam zawk chu an kahthlak sak tih an sawi ve thung. 

Israel prime minister Benjamin Netanyahu chuan Iran chu khawi hmunah mah beih theih loha humhimna pek a ni lo tih sawiin, "Mi tu emawin thah che an tum a nih chuan, nangman that hmasa zawk mai rawh," tiin a twitter-ah Israel sipaite chet lak chungchang a sawi. 

Hetihlah hia Quds Force enkawltu, Islamic Revolutionary Gaurds Corps chuan Syria rama Iran sipaite hmun kahchhiat a awm lo tih a sawi thung a, Revolutionary Guard’ Major General Mohsen Rezaei chuan Israel thu­sawi chu thu dik lo a ni, a ti. "Israel leh US chuan Iran centre-te bei turin thu­­neihna an nei lo a, kan centre tihchhiat a awm lo bawk a ni," a ti. Syria ram­ah chuan sipai a dah lo a, adviser chauh a dah tiin a sawi chhunzawm bawk.