Amazon ram kangin ziaawm lam pan thei lo

Kar thum zet kang tawh, Brazil rama Amazon ram kang chuan ziaawm lam a pan hleihtheih loh avangin Amazon state paruk- Para, Rondonia, Roraima, Tocantins, Acre leh Mato Grosso-te chuan ram kang ṭhelh tura sipai ṭanpuina an dil.

Environment Minister Ricardo Salles chuan nimin khan heng state parukte'n ṭanpuina an ngen angin Brazil president Jair Bolsonaro chuan Amazon ramngaw kang mek ṭhelhnaa pui turin an ram sipaite chu a hriattir tih a sawi. 

National Institute for Space Research (INPE) tarlan danin Ningani leh Zirtawpni khan Brazil-ah hmun 1,663-ah ram hi a kan belh a, heng zinga hmun 1,200 chu Amazon huang chhunga mi an ni. Official-te chuan kumin chhunga Brazil ram kang hi hmun 78,383-ah a thleng a, 84 %-in kum hmasa aiin a tam. Heng ram kang zinga a chanve chu Amazon rama thleng a nih thu an tarlang bawk.

Environmentalist-te chuan loneitu­te'n ran tlatna tura ram an dah awl hmun chu thlai ro leh hnim ro awmna hmun a ni a, a kan duh thu leh hetaṭanga rawn irh chhuak a nih an rin thu an sawi. Defence Minister Fernando Azevedo chuan National Force fire­fighter 44,000 te chuan, ram kang ṭhelh turin ke an pen chhuah tawh thu a sawi. Sipai 700 chu Rondonia khawpui Porto Velho a kang ṭhelh turin tirh an ni a, tui litre 12,000 keng thei C-130 Hercules aircraft pahnih hman a nih bawk thu a sawi.

Brazil Climate Center executive director Alfredo Sirkis chuan sipaite hmalakna hi an thlawp thu a sawi ve bawk. European Council president Donald Tusk chuan Mercosur bloc an tih, Latin America rama Brazil, Argentina, Paraguay leh Uraguay-te nena EU Trade Deal siam chu Amazon ramngaw tihkan belh a ni a, tihchereu a nih zel chuan a rem loh thu a sawi. 

US president Trump pawhin a Twitter-ah,"United States-in ṭanpui theihna kan nei a nih phawt chuan kan inpeih reng a ni," tiin Brazil-in harsatna a tawh mek chu puih a inhuam thu a sawi.