US-ah Covid-19 vangin mi nuai 2 - 2.4 vel an thih ring

White House chuan hri darh tur venna atana social distancing rules an hman mek chu ṭha taka kenkawh a ni chung pawhin, he hri hi an ramah mi nuai 2 aṭanga nuai 2.4 velin an thihpui a rinawm thu a tarlang. 

Hemi chungchang hi Thawhlehnia White House briefing neihnaah sawi langin, social distancing rules hi hman a nih loh chuan hripui vanga thi mi maktaduai 1.5 aṭanga maktaduai 2.2 vel an tling thei dawn a ni, a ti. 

National Institute of Allergy and Infectious Diseases director Dr Anthony Fauci chuan a chhe ber thleng tura an inbuatsaih a ngai a ni tih sawiin, hemi rual hian hetiang zat thihna erawh thleng lo hram se tih a beisei thu a sawi. 

President Donald Trump pawhin sorkarin hri darh zel tur venna kawnga a hmalakna chu 'thih leh dam inkar a ni' tiin, mipuite chu social distancing rules an siam chu ṭha taka zawm turin a ngen. An ram mipuite chu kar hnih chhung, hun khirh tak hmachhawn tura inbuatsaih turin a ngen a, sorkar thu awiha theihtawp an chhuah tlan chuan he hun khirh tak hi paltlangin, hun eng mawi tak an hmu leh thuai dawn tih a sawi.