Israel-in West Bank-ah in 300 sak belh tum

Israel prime minister Ben­jamin Netanyahu chuan nimin khan Palestine an ram luah, West bank-ah in 300 sak belh a nih dawn thu a sawi. 

Benjamin Netanyahu chuan Zirtawpni-a Palestinian-ten bomb hmanga an beih chhanletna atan in sak belh tur hian ruahmanna an siam tih a sawi. Zirtawpnia Palsestinian bomb tihpuahah hian tleirawl kum 17 a thi a, a nuṭa leh a pa an hliam bawk a ni.

"Kan insawhnghet zel ang a, kan hmelmate kan bei let zel dawn a ni. Kan inthuam chak zel dawn a, inbengbelna kawngah pawh hma kan sawn zel dawn a ni," a ti. Israel hian Sept. 17 hian inthlan an hmachhawn leh dawn a, kumtir lamah khan inthlan hmachhawn tawh mah se sorkarna siam thei an la awm loh avangin inthlan ṭhatna hi an nei leh dawn a ni.

Kar liam ta chhung khan West Bank-ah hian tharum thawhna a hluar zel a, East Jerusalem-a Al-Aqsa Mosque compound-ah pawh Palestinian-te leh Israel police-te nasa takin an innawrbuai bakah Gaza Strip ramriah pawh buaina a chhuak nasa hle bawk.

West Bank-a Israel-te chenna hmun hi 1967 Middle East War laia Palestine ram a chhuhsak, a luahzui a ni. Ram hrang hrangin nasa takin sawisel mah se a luah chhunzawm zel tho a, in a sak belh reng bawk. 

Gaza aṭanga rocket hmanga beih an nih hnuah, Israel chuan Gaza Strip tana oil supply chu a tihtlem sak nghal. Gaza Strip-a power plant awmchhun tana fuel supply chu Israel chuan a chanve-ah a tihtlem sak a ni.

Hemi hma pawh hian Gaza hian electricity supply a neih chhe hle a, hetianga Israel-in hremna a pek belh leh hian mipuite dinhmun hrehawm takah a dah dawn tih Gaza power company thupuangtu Mohammad Thabet chuan a sawi. Gaza Strip-a chengte hian darkar 6 electric eng an hmuh hnuin, darkar 12 chhung an thim leh ṭhin. Thabet chuan fuel supply tihtlem a nih leh tak avangin electric eng pekchhuah theih hun hi darkar li vel chauh a ni thei dawn tih a sawi a ni.