Sudan Prime Minister tharin US terror list aṭanga paih duh

Sudan prime minister thar Abdalla Hamdok chuan Washington-in terrorist sponsor ram a tarchhuah zing aṭanga paih an nih theihna turin US official-te a bia tih a sawi.

Prime Minister office a luah hnu lawkah khan hemi chungchang hi Hamdok hian sawiin, Sudan chuan bung thar a kai tawh a, US terror list aṭanga an ram hming thai bo chu thil pawimawh hmasa a ni, a ti. "Democratic Sudan hi eng ram tan mah hnawksak a ni lo," tiin a sawi a ni.

US-in terrorist sponsor ram a siam aṭanga paih a nih chuan Sudan tan hian ram danga investment an tihna tur kawng a inhawng dawn a, International Monetary Fund aṭanga ṭanpuina leh World Bank bailout package-te pawh an dawng thei dawn tih a sawi bawk.

US hian 1993-ah daih tawh khan Sudan hi terrorist sponsor-tu ramah a puang a ni.