DR Congo Thla sarih hnuah sorkar thar ding

Democratic Republic of the Congo chuan president Felix Tshise­kedi lakluh a nih aṭanga thla sarih zet a liam hnuah ṭangrual sorkar thar din a nih thu a puang.

President Felix Tshisekedi thu­puangtu chuan nimin khan hemi chungchang hi sawiin, sorkar thara thuneihna insem a nih dan chungchangte pawh a tarlang a ni. Tshisekedi-a Direction For Change party hian member 23 an nei a,  president hlui Joseph Kabila kaihhruai Common Front for Congo (FCC) chuan seat la awm zawng, seat 42 zet chu an luah ve thung.

Prime minister Sylvestre Ilunga Ilukamba pawhin sorkar thar siam a nih tak thu sawiin, president pawhin a pawmpuina hming a ziak tawh a, hna an thawk ṭan thuai dawn tih a sawi a ni. Sorkar an siam lawk theih loh chhan chu party pahnihte hian an inkara inrem lohna awmtheite chu an dahbo hmasak phawt a ngai a, hei hian hun a duh rei deuh a ni, a ti.

DR Congo hian nikum December thla khan president thlanna hi an nei tawh a, December 30 khan inthlan result hi puangin Tshisekedi hi thlan tlin a ni. January thla aṭang khan a office hi a luah ṭan a, Thawhṭanni khan sorkar thar siam a nih thu hi puan a ni chiah thung.