Indonesia khawpui thar tur thlang fel

Indonesia chuan an ram khawpui thar siam a rawt hnuah, khawpui thar atan  Borneo Island-a East Kalimantan province chu thlan a nih thu nimin khan president Joko Widodo chuan a puang. 

Indonesia khawpui, Jakarta hi a tawt tawh bakah khawpui hi a tlahniam zel a, hmun ngaa ṭhena hmun hnih chu sea level hnuaiah awmin, a dangte pawh kum khatah cm 20 vel zelin a tlahniam a ni. Hei bakah hian khawpui tawt lutuk leh boruak bawlhhlawh chu he khawpuia cheng, mi maktaduai 10 vel tan harsatna lian tak a tling tawh a ni. Hei vang hian sorkar chuan khawpui hi sawn a rawt a ni. 

Khawpui thar tura thlan, Kaliman­tan province-ah hian sorkar chuan ram hectare 1,80,000 a zau a nei sa a ni. Khawpui sawnna tura an rawtna hmun hi khuarel chhiatna thleng ṭhin lakah pawh a him thei deuh tura ngaih a nih thu president chuan a sawi. Khawpui sawnna tur draft bill hi sorkar chuan siamin, Parliament pawmpuina la turin thawn a ni thuai dawn tih a sawi bawk. 

Kalimantan province hi Jakarta hmarchhak lam, km 1,400 vela hlaa awm a ni a;  kum 2021 aṭangin hna thawk ṭanin, sorkar office-te chu kum 2024-ah sawn hman tum an ni. President Widodo chuan khawpui thar siamna tur hian US dollar tlukleh­dingawn 33 ruahman a ni tih a sawi. Heng zinga 20% hi sorkarin a tum dawn a, a bak chu private sector hnuai­ah an thawhpuiten an tum thung ang.