UK-ah hri leng vanga thi 27% in pung

United Kingdom (UK) in Thawhlehnia report a tihchhuah, an rama coronavirus vanga thi chu a hma ni aiin 27% in a pung. 

Cabinet office minister Michael Gove chuan thi zat pung nasa chuan a ṭhawngin a rilru a tihrehawm hle tih a sawi a, eng anga nasain nge an la tawrh dawn hriatthiam phak a ni lo tih a sawi. Hemi rual hian mipuiten ṭangruala theihtawp an chhuah chuan, hri hluar zel tur leh thihna thleng tam lutuk tur hi an tiziaawm thei dawn a ni, a ti. 

Thawhlehni khan London hospital-ah rawlthar, kum 13 mi chu coronavirus vang hian a thi a, Britain-a he hri vanga thi zinga naupang ber a ni. 

England-a National Health Service director Stephen Powis chuan sorkar thupekte zawm ṭhat a ngai hle tih sawiin, a hma angin hri kai zat hi an pung chak lo a, hemi rual hian inthlahdah a la hun lo tih a sawi bawk. Sorkarin medical ventilator a order-te pawh tun kar tawpah peihfel a ni dawn a, kar leh hian hman theih a ni dawn tawh tih a sawi.