Israel-a UAE palai thar tur lalut

Israel leh United Arab Emirates (UAE) ramten thawhdunna tura inremna an siam hnuah, Israel-a UAE ambassador hmasa ber atan Mohammed Mahmoud al Khaja chu lakluh a ni. 

Ambassador thar hi UAE prime minister  Sheikh Mohammed bin Rashid Al Maktoum chuan rinawmna thu tiam tirin a lalut a ni. Lakluh inkhawm buatsaihah hian deputy prime minister H.H. Sheikh Mansour bin Zayed Al Nahyan bakah minister leh senior official eng emaw zat an tel. 

Sheikh Mohammed chuan Al Khaja chu duhsakna hlanin, UAE leh Israel inṭhianṭhatna leh thawhdunna tinghet zel tura theihtawp chhuah turin a chah. Al Khaja hian engtikah nge Israel hi a pan dawn sawichian a la ni lo. January thla tawp lam khan Israel chuan UAE-a a embassy chu official-in a lo hawng tawh a, ambassador Eitan Na’eh pawh dah a ni tawh. Hemi ni vek hian UAE pawhin Tel Aviv-a embassy hawn a remti bawk a ni. 

Israel leh UAE hian US President kalchhuak ta, Donald Trump hmalaknain thawhdunna tura inremna siam an remti a, nikum September thla khan White House-ah Abraham Accords  an ziak a ni. He accord hi Bahrain pawhin zawmin, Israel nen thawhdunna tur an siam ve bawk. 

Accord siamna kawnga puitu, Trump-a assistant hlui Avi Berkowitz chuan Israel-a UAE ambassador tur ruat a ni chu lawmawm a tih thu a sawi a, Abraham Accord siam a nih theihna atana theihtawp lo chhuah tu, President hlui Trump leh Jared Kushner kaihhruai team-te pawh hei hian a tilawm hle tih a sawi. 

Embassy hawn leh ambassador dah chungchang chu ram pahnihte hian tifel tawh mah se, visa chungchanga inremna an siam tum erawh chu coronavirus hripui leng vangin an la tikhawtlai rih. Tun thla tir lam khan Israel prime minister Benjamin Netanyuhu chuan UAE hi tlawh a tum a, a zin tur hi ṭhulh lehin a kal theih hun tur hi a la tichiang lo.