Covid-19 lockdown hlip turin Britain PM nawr

Britain prime minister Boris Johnson chuan an rama Covid-19 lockdown hman mek chu hlip tawh tura nawrna a tawk.

Britain-ah hian Covid-19 hri chi dang hmuh chhuah a nih hnua hri kai an pun chak chhoh em avangin lockdown hi puan a ni leh a, PM Johnson chuan thla hnih leh a chanve chhung hman turin a ruahman a, April thla tawp lamah a tawp dawn chauh a ni. Mahse politician dangte chuan khuahkhirhna siamte hi thlahdul turin an nawr a ni. 

Pathianni khan Johnson chuan Covid-19 vaccine chu mi maktaduai 15 hnenah a dose khatna tur pek an ni tawh tih a sawi a, hei vang hian lockdown hlip tura nawrna pawh a zual phah bawk. Johnson chuan February 22 hian lockdown tihtawp dan tura sorkarin ruahmanna a siamte puan a tum a, amah ngei pawhin March 8-ah chuan school-te hawn theih tawh a beisei thu a lo sawi tawh a ni. 

Britain-ah hian Pathianni khan hri kai hmuh chhuah thar 11,000 dawn an awm leh a, mi 258 in an thihpui leh bawk. Hripui vanga thi hi mi 1,17,000 chuang an awm tawh.