Indo turin Pakistan inpeih reng : Pakistan FM

Pakistan foreign minister Shah Mahmood Qureshi chuan Jammu and Kashmir special status tihtawp a nih vanga India nen an inep mekah, Pakistan chu eng indona pawh hmachhawn turin a inpeih reng a ni, a ti. 

Thawhṭan­nia Islamabad-a hun a hmanah, Qureshi chuan J&K a boruak ralmuang leh ngelnghet tak tichhe tura India chetdan chu khawvelin a hmu reng a ni, a ti. India chuan rawng taka a chet dan leh, human rights a palzut nasat dan thup turin a theih dan ang angin khawvel ramdangte rilru chu lakpen sak a tum dawn tih a sawi. Pakistan leh India chu nuclear power ram ve ve an nih avangin an indo a nih chuan a nghawng thui hle dawn tih a sawi bawk. 

Twitter-in Pakistan President hriattirna pe 

Pakistan President Arif Alvi chuan Thawhṭanni khan a Twitter-ah Kashmir chungchang avanga nawrh huaihawt an neihlai video a post a, hei vang hian Twitter lamin hriattirna an pe. 

Arif Alvi hnen aṭanga mail a dawn chu Pakistan human rights minister Shireen Mazari chuan a screenshot a, a Twitter-ah post-in Twitter ho thil tih chu a atthlak thu a sawi.Pakistan minister for communication Murad Saeed pawhin kar kal ta Pathianni khan micro-blogging site aṭangin hriattirna a dawn thu sawiin, a tweet pakhat chuan India dan a bawhchhia nia sawi a nih vangin hriattirna a dawng tih a sawi. 

Director General (DG) Inter Services Public Relations (ISPR) Maj Gen Asif Ghafoor chuan kar kal ta khan Twitter leh Facebook thuneitute'n Pakistan social media account tam tak an tihtawp sak thu a sawi bawk. Twitter leh Facebook regio­nal headquarters-ah hian India mi ṭhenkhatte an thawh thu sawiin, hei vang hian Pakistan mipuiin social media lama J&K chungchanga an lungngawi lohna an tarlante hi ngai thei loin, an tihtawp lailawk sak thu Asif Ghafoor chuan a Twitter-ah a tarlang.