Brazil-in G7 ṭanpuina la duh lo

Brazil chuan Thawhṭanni khan G7 ramte'n Amazon ram kang ṭhelhna kawnga ṭanpuina tur pawisa USD mtd 22 pek an tum chu a hnar.

Brazil president chief of the staff Onyx Lorenzoni chuan ṭanpui an tumna chu ngaihluin lawmawm an tih hle tih a sawi a, hemi rual hian an ṭanpuina pek tum chu Europe-a ram­ngaw thuam ṭhatna atana hmang zawk turin an duh tih a sawi.

Environment Minister Ricardo Salles chuan, "Kan rama Amazon ramngaw hectare 9,50,000 chuang kang ṭanpuina G7 ramte'n min pek hi ṭha ka ti em em a, nimahsela president Bolsonaro leh minister te'n meeting an neih hnuah Brazil sorkar chuan ṭanpuina kan dawn chu la rih lo turin kan ti ta a ni," a ti. 

Brazil-in ṭanpuina an lak duh loh chhan ber nia lang chu, France president Emmanuel Macron-a'n a Twitter-ah Amazon ramngaw kang hi international crisis a nih thu leh G7 summit neih turah ngaihtuah hmasak ber tur tia, a tweet vang a ni. Brazil official-te chuan France president chu a ram chhung thilte ngaihtuah hmasa zawk turin an ti a ni.