United Nations-in Myanmar sipai vau

United Nations chuan Myanmar sorkar thuneihna hnehchhuhtu, sipaite chu an rama sipai chet dan duh lohna lantira nawrh huaihawtte chungah rawng taka a che a nih chuan a nghawng na tak a tuar dawn tiin a vau. 

UN special envoy Christine Schraner Burgener chuan Myanmar sipai hotute hi biain, boruak ṭha tak hnuaia nawrh huaihawt chu zahsak an ni tur a ni, a ti. Thawhṭanni zana Myanmar ram puma internet service tihtawp pawh nimin zing aṭang khan hman theih a ni leh tawh bawk. 

Sipaiten sorkar thuneihna an hneh­chhuh hnuah mipuite chuan ni eng emaw zat lungawi lohna lantirin nawrh an huaihawt tawh a, nimin pawh khan Yangon leh Mandalay khawpuiah te mi tam tak an pungkhawm leh a ni. Yangon-a sipai chet dan duh lohna lantirnaah hian Buddhist puithiamte pawh an tel. Mahse khawpui hrang hranga nawrh huaihawtnaah hian kar hmasa lam aiin pungkhawm an tlem tawh nia sawi a ni. 

Hetih lai hian sipaite chuan sipai hotute dodaltute chu hremna pek an ni dawn tih puangin, sipaite an hna thawk thei loa lo dangtute chu kum 20 thleng lungin tan tir theih an ni ang, a ti. Hei bakah hian buaina chawk chhuak thei zawnga mipuite fuihtute chu kum 3-7 lungin tan tir theih an ni dawn bawk. 

Inrinni liam ta khan sipai chuan court thupek nei lo chunga mi dap leh darkar 24 aia hren theihna tur thupek a inpe a, hei bakah hian journalist-te chu an rama rorelna inthlak chungchang chu sipai chakna hmanga sorkar paihthlak tih zawnga ziak lo turin a ti bawk a ni. 

Assistance Association for Political Prisoners (AAPP) chuan sipaiten thuneih­na an lak hnuah mi 426 vel an man tawh a, an zinga 391 chu  hren zui an la ni mek niin a sawi. 

Thuneihna chelh mektu, Myanmar sipaite chuan an ram inthlanpui buatsaih a, hnehna changtu hnenah thuneihna hlan a tiam. Sipai chakna hmangin sorkar thuneihna hnehchhuh a ni lo, a ti bawk. 

Sipai hotute chuan nimin khan thuneihna an chelh hnua a vawi khatna atan press conference neiin, brigadier general Zaw Min Tun chuan an tum ber chu inthlanpui  buatsaih a ni tih a sawi a, sipaite chuan thuneihna chu chelh reng an tum lo a ni, a ti. 

Inthlan buatsaihnaa dik taka hnehna changtu hnenah chuan thuneihna an hlan ngei dawn tih a sawi. Mahse February 1-a sorkar thuneihna an laksak hnu khan sipai hian ram pumah kum khat atan state of emergency a puang nghal a, inthlan pawh hi eng huna buatsaih nge an tum tih pawh an sawilang tel lo.  

State Counsellor Aung San Suu Kyi leh president Htin Kyaw Win Myint an hren mekte chungchang zawhna chhangin, an chunga ro rel dan turah ram danpuiin a sawi ang zela tih a ni dawn tih a sawi bawk. Suu Kyi hi ram pawn lam aṭanga dan loa walkie-talkie radio lakluh kawla puhin thubuai siamsak a ni a, nimin khan Natural Disaster Management Law bawh­chhiaa puhna thubuai dang siamsak a ni leh tih a lawyer chuan a sawi.