WTO hotu atan Ngozi Okonjo-Iweala thlang

World Trade Organization (WTO) chuan lungrual takin an pawl hotu lu ber, director-general thar atan Nigeria finance minister hlui Ngozi Okonjo-Iweala an thlang. Hmeichhiate zinga WTO hotu ni thei hmasa ber a ni ang.  Thawhṭannia Geneva-a virtual general council meeting neihah World Bank veteran hi WTO hotu atan hian thlan a ni. 

Dr. Okonjo-Iweala hi hmeichhiate zingah leh, African zingah WTO hotu lu ber ni thei hmasa ber a ni dawn a, March 1 aṭangin a hna thar hi chelh ṭanin, August 31, 2025 thleng a chelh dawn tih WTO thuchhuah chuan a tarlang. A term hi pawhsei theih a ni bawk ang. 

Kum 66 mi, Okonjo-Iweala hi finance expert, economist leh international development professional a ni a, working experience kum 30 chuang a nei. Nigeria finance minister term hnih a ni tawh a, rei vak lo foreign minister-ah a awm bawk. World Bank-ah kum 25 zet a lo thawk tawh bawk a, Managing Director of Operations pawh a ni hman a ni.