Myanmar sipai sawiseltu kum khat tang tura hrem a ni

Myanmar sipai a sawisel avangin filmmaker Min Htin Ko Ko Gyi chu kum khat tang turin hrem a ni. 

Activist leh human rights film festivals founder, Min Htin Ko Ko Gyi hian kum 2008-a sipai sorkar laia constitution an siam chu a Facebook-ah a sawisel a, hei vang hian kumin April thla khan man a ni. Mipuite rilru tichiai leh hlauhna siamah puhin thubuai siamsak a ni a, nimin khan Yangon-a Insein court chuan rim taka hna thawka kum khat tang turin a hrem ta a ni. 

Sipai sorkar siam constitution-ah hian civil sorkar hnuaiah pawh armed service pathum tan parliament seat hmun lia ṭhena hmun khat dah a ni a, hei bakah hian ministry pawimawh pathum chu sipai tana dah a ni bawk. 

Min Htin Ko Ko Gyi chuan hremna an pek chu a rin lawk ang a nih thu leh, mak a tih hran loh thu a sawi. Hemi rual hian constitution siamṭhat a nih theihna tur hian mipuite chu lungrual taka thawkho turin a sawm zui a ni.

A ukil, Robert San Aung chuan court sang zawkah an appeal dawn tih sawiin, a client hian thin cancer a neih avangin a ngaihtuah hle tih a sawi.