British Parliament suspend duh loin Mi tam takin kawng an zawh

British prime minister thar Boris Johnson chuan Nilaini khan House of Commons suspend a nih dawn thu a puang a, hemi duh lo hian Nilaini zanah khan mi tam takin kawng an zawh nghal.

Kawngzawhte hian thuziakte kengin, Boris Johnson chu politics hmanga inphiarrukna kalpuiah an puh. An ram huna Nilaini zingah khan Queen Privy Council-a Conservative member pathumte chuan Balmoral-ah Prime Minister aiawh hian Parliament suspend tura ngenna hi an keng a ni. Hei hi Lalnu pawhin a lo pawmpui.

Parliament suspend tumna hian British ramchhung hmun hrang hrang a dengchhuak hneh hle a, mi maktaduai chuangin a khinna turin hming an ziak hial. Hetiang hi ni mah se sorkar chuan September leh October-a kar nga chhung Parliament suspend chuan Brexit chungchanga debate neih a tibuai dawn lo tih an sawi ve thung.

House leader  Jacob Rees-Mogg chuan PM hmalakna duh lotute chuan an duh lo tak tak lo tih leh European Union-a la awm an duh vang niin a sawi. Brexit aṭanga inhnuhdawh huntawp atana ruat chu October 31 daih a nih avangin debate neihna hun a la awm a ni, a ti.

Nilaini khan Johnson chuan October 14-a Parliament suspend a nih zawh hunah Lalnu pawhin Brexit chungchangah hian thuchah a sawi dawn tih a sawi bawk. Labour leader Jeremy Corbyn erawh chuan thil pawm theih a ni lo tih sawiin, Prime Minister thiltih dan chu democracy tihchhiatna a ni, tiin a sawisel.

British Parliament suspend dodaltute hi Bexit deal duh lotute leh eptu lam an ni tlangpui a ni.