DMZ-ah Trump leh Kim inhmu NKorea ram chinah Trump a lut

US President Donald Trump-a leh North Korea hotu Kim Jong-un-a te chu nimin khan Korea ram pahnih inrina, Demilitarized Zone (DMZ) a border village, Panmunjom-ah an inhmu. He hmun aṭang hian NKorea ram chinah President Trump hi a lut a ni. 

Hruaitu pahnihte hi kumin February thlaa Hanoi, Vietnam-a summit an neih hnua an inhmuh lehna hmasa ber a ni. Summit an neih vawi hnihna hi inremna mumal siam loin an titawp a ni. Nikum June thla khan summit vawi khatna chu Singapore-ah an lo nei tawh bawk. 

Donald Trump-a hi ni hnih chamin South Korea-ah a zin mek a ni. Nimin khan DMZ-ah Kim-a nen hian inhmuin, hemi hnu hian North Korea ram chinah a lut a ni. US President ni lai zinga North Korea rama lut hmasa ber a ni. President Trump-a chuan a tana thil chhinchhiah tlak tak a nih thu sawiin, Korea ram pahnih ramri a kan thei chu a inchhuang hle tih a sawi. 

DMZ hi km 4-a zau leh km 250-a thui a ni a, kum 1953-a Korean War a zawh hnuah Korea ram pahnih ṭhenna atana hman a ni. DMZ-ah hian border village, Panmunjom awmin, he hmuna Joint Security Area (JSA) siamah Korea ram pahnihten inbiakna an neih pawhin midang ram china lut loin he hmunah hian an inbe ṭhin. Korea ram pahnihten an phalsak chuan khualzinte pawhin JSA hi tlawh theih a ni. Mahse US president an nih laia he hmun tlawh hi Trump-a tih loh chu an la awm lo a, President hlui Bill Clinton-a phei chuan he hmun hi khawvela hmun hlauhawm ber tiin a lo sawi tawh a ni. 

Donald Trump hian Kim Jong-un hi US-a zin turin a sawm nghal a, mahse a sawmna hi a pawm leh pawm loh sawichian a la ni lo. Kim Jong-un hian a pawm a nih chuan NKorea ram hruaitu zinga US-a kal hmasa ber tur a ni ang.