US-in Myanmar internet shutdown titawp turin nawr

Myanmar sorkarin helpawl leh sipaite inbeihna thleng avangin Rakhine leh Chin state-ah internet service a la titawp chhunzawm zel a, hei hi hlip turin ram hrang hrangten an nawr. US pawh internet shutdown titawp tura nawr zingah a tel ve leh. 

Myanmar Ministry of Transport and Communications chuan June 21 khan Rakhine state-a khaw lian pariat leh a ṭhenawm, Chin state-a khaw pakhat huam chhunga mobile phone operator-te chu internet service titawp turin a lo hriattir tawh a ni. Hei hi sipaiten helpawl Arankan Army laka beihpui an thlak vang a ni. 

US State Department thupuangtu Morgan Ortagus chuan data shutdown chuan mi nuai tel a nghawng a, hei hi US chuan a ngaimawh hle tih sawiin, tikhawtlai loa internet service chu tiṭha leh nghal tura an phut thu a sawi. Kumin chhungin Rakhine state-ah hian sipai leh helpawlte inbeihna avangin civil mi 30,000 vel an tlanchhe tawh a ni. 

Human Rights Watch (HRW) chuan internet shutdown hian chhawmdawl hna an thawhna kawngah harsatna a thlen thu a sawi. WhatsApp chu Rakhine state-a chhawmdawlna hna thawktur hrang hrangten an hman ṭangkai tak a ni tih sawiin, hman theih loha siam a nih vang hian harsatna an tawk nasa hle tih an sawi.