Covid-19 Hri kai thar 16% in tlahniam : WHO
World Health Organisation (WHO) chuan khawvel pumah Covid-19 hri kai thar chu kar hmasa lam aiin 16% in a tlahniam tih Thawhlehni zan khan a tarlang.
Thawhlehni zana weekly update a tihchhuahah, WHO chuan kar khata hripui vanga thi zat report pawh kar hmasa lam aiin 10% in an tlem tawh zawk tih a sawi bawk. Africa leh Western Pacific-ah hri kai thar zat hi kar hmasa lam aiin 20% a tlahniam a, Europe-ah 18%, America-ah 16% leh southeast Asia-ah 13% in an tlahniam bawk a ni.
WHO director general Tedros Adhanom Ghebreyesus chuan kar nga chhung chu a zawnin hri kai thar hmuhchhuah hi an tlahniam tawh tih sawiin, coronavirus chi dang hi hmuhchhuah belh ni mah se, theihtawpa hri darh tur venga hmalakna chuan awmzia a nei hle tih a tilang a ni, a ti.
Nikum kumtawp lama Britain rama Covid-19 hri chi dang hmuh ang chu ram dang 94-ah hmuh a ni tawh a ni. Heng zinga ram 74-ah chuan he hri chi dang kaite hi ram dang aṭanga lut ni loin, tualchhung aṭanga kaite nia sawi an ni.
South Africa-a hri chi dang hmuh pawh ram 46-ah a darh tawh a, Brazil-a hri hmuh ang chi pawh ram 21-ah hmuh a ni tawh bawk.
Hri kai hmuhchhuah mtd 110 dawn ni tawh
John Hopkins University data-a lan danin, khawvel pumah Covid-19 hri kai hmuhchhuah tawh chu mi 10,95,32,172 an tling tawh a, he hripui hi mi 24,18,416 in an thihpui tawh bawk.
US, India leh Brazil ramte chu hri kai hmuhchhuah tamna ram pathum an la ni chhunzawm zel. Hri kai leh thihpui tamna ber ram, US-ah chuan state tam zawkah hri kai thar an tlahniam tawh a, mahse state pali - Delaware, South Carolina, Nebraska leh South Dakota-ah erawh chuan an la pung thung.
India chu hri kai tam ber dawttu ram ni mah se, he hri thihpui tam lamah chuan a palina a ni a, Brazil leh Mexico ram aiin hri vanga thi hi an tlem zawk a ni. US-ah chuan Covid-19 vanga thi hi mi 4,88,081 an tling tawh.