Kum khat chuang hnuah Kim Jong-un nupui mipui hmuhah inlan
North Korea ram hotu lu ber, Kim Jong-un nupui, Ri Sol-ju chu kum khat chuang zet mipui hmuha a inlan tawh loh hnuah, Thawhlehnia Kim-a pa, Kim Jong-il piancham hriatreng hun hmanah a inlan ve leh.
Ri Sol-ju hian a hma chuan a pasal hi hun pawimawh bikah a ṭawiawm ṭha hle a, mahse nikum January thla aṭang khan a pasal hi a zui tawh ngai lo a, mipui hmuhah a inlan tawh ngai lo. Hei vang hian a hriselna lam a ṭha tawk lo tih leh, nau a pai nia sawite a awm a ni.
Hetih lai hian South Korea national intelligence service chuan Ri hi Covid-19 vangin a pawnchhuak duh lo niin a tarlang thung. Mahse North Korea official report chuan an ramah Covid-19 hri kai an awm lo niin a sawi a, hei hi expert lam erawh chuan a ring lo hle thung.
Kim Jong-un nupui, Ri Sol-ju hi upper class family ami niin, a pa hi professor leh a nu hi obstetrician nia sawi a ni. Kum 31 mi niin, a pasal neih hma hian sorkarin a thlan chhuah, elite group Unhasu Orchestra-ah singer a ni ṭhin. Kum 2009 khan Kim nen an innei a, fa pathum an nei tawh niin South Korean intelligence lam chuan an sawi.