America mipuiten July-ah vaccine la vek hman dawn : Biden

US President Joe Biden chuan Covid-19 vaccine chu America mi zawng zawngin July thla hmain an la thei dawn tih a sawi. 

Biden hian a hmain vaccine hi an ram mipuite nipui hmain an lak theih vek a beisei thu a lo sawi tawh a, mahse hei hi White House chuan a theih a rinawm loh thu sawiin, vaccine mamawh ang zat an hmuh thei loh mai theih thu leh, a sem darhna lamah pawh harsatna a awm theih tur thu a sawi a ni. 

Thawhlehnia CNN town hall meeting neihnaah zawhna a chhanah, President Biden chuan American mipuite chuan July thla tawpah Covid-19 vaccine chu an lak hman vektur thu a sawi. "July thlaah chuan vaccine hi dose maktaduai 600 kan nei tawh dawn a, America mi tinte daih tur kan nei dawn a ni," a ti. President chuan a hma thei anga school hawn chu a duh tih sawiin, zirtirtute vaccine pek hmasak chu a thlawp thu a sawi bawk.