EU Parliament-in Venezuela President atan Guaido pawm

European Union Parliament chuan Venezuela interim president-a inpuang, Juan Guaido chuan Venezuela ram hotu lu ber atan a pawm. 

EU Parliament member-te hian Ningani khan Venezuela ram chungchang ngaihtuah hian Brussels-ah special session an nei a, hetah hian Venezuela National Assembly hotu Juan Guaido chu interim president atana pawmna resolution an pass a ni. Vote laknaah Guaido thlawp lamah vote 429 tlain, a thlawp lo lamah vote 104 a tla a, member 88 in vote an thlak lo thung. 

Vote lak hnuah Parliament chuan thuchhuah siamin, an member ram hrang hrang sorkarte pawh Venezuela rama president thlan ṭhatna tur buatsaih a nih hma chuan Guaido chu interim president atana pawm vek turin a ngen.

Kar kalta Inrinni khan Britain, France, Germany leh Spain chuan Venezuela president Nicolas Maduro chu ni riat chhunga inthlan buatsaih turin an lo nawr tawh a, a buatsaih lo a nih chuan Guaido chu an ram hruaitu atana an pawm tur thu a sawi. Mahse Maduro chuan Europe ram ho ngenna hi a hnawl thu a sawi tawh, Europe ram hruaitute chu US President Donald Trump-a policy ang apiang zawmah a puh a ni.  

Guaido chuan European Parliament-in interim president atana a pawm chu lawmawm a tih thu sawiin, hei hi an rama democracy tundin an tumna kawnga hmasawnna pawimawh tak a ni, a ti. 

Hetihlai hian January 10-a Venezuela president term hnihna chelh tura lakluh, Maduro chuan Guaido chu US-in amah paihthlakna tur kalpui turin a ti niin a puh. US leh khawthlang ram ṭhenkhat chuan Guaido hi an thlawp thu sawi mah se, Russia leh ramdang eng emaw zatin Maduro hi an thlawp ve thung.