Pollution vangina Bangkok-a school khar

Thailand khawpui, Bangkok-a boruak bawlh-hlawh nasat vangin Nilaini aṭang khan tunkar chhung atan school 400 chuang khar a ni. 

Pollution nasat chhan hi motor khu tihchhuah te, in sakna hmun aṭanga bawlhlhawh tihchhuah te, thlai ro hal leh factory te meikhu tihchhuah vang nia sawi a ni. Thuneitute chuan boruak bawlhhlawh tihfai tum hian theihtawp chhuah mah se an la hlawhtling thei lo. 

World Air Quality Index project (AQICN) in a tarlan danin Bangkok Air Quality Index (AQI) hi 170 vel a tling a, hei hi mihring hriselna tana hlauhawm phaka ngaih a ni. Hei vang hian naupangte hriselna venna atan school hi khar a ni a, pawn chhuak tam lo tura thurawn an ni bawk. Karleha Lunar New Year lawmna neih turah pawh mipuite chu halpuahte hal lo turin thuneituten an ngen.