Maduro-an Parliament inthlan buatsaih hma a rawt

Venezuela President Nicolas Maduro chuan an ram politics buaina tawk mek chinfelna turin National Assembly inthlan buatsaih hma a rawt. 

Kar kalta Inrinni-a an ram khawpui, Caracas-a Bolivar Avenue-a amah thlawptu pung-khawmte hmaa thu a sawiah, Maduro chuan rorellai lam thuneihna, Constituent National Assembly chuan eptu lam thuneihna, National Asssembly-a inthlan buatsaih hma a nih dawn leh dawn loh a rel dawn tih a sawi. 

National Assembly inthlan hi kum 2020-ah neih tur a ni. Mahse Maduro chuan eptute inbiak an duh a nih chuan inthlan buatsaih hma chungchang hi sawiho a ni ang, a ti. 

Kum 2017 khan Maduro-an an ram danpui siamṭhatna tur a duan hnuah Constituent National Assembly inthlan hi neih a ni. Eptu lamin inthlan hi an boycott avangin Maduro kaihhruai sorkar thlawptu lam chu hneh taka thlan tlin an ni. He inthlan hi US, European Unoin leh Organization of America States-te pawhin an pawmpui lo a ni. 

Mahse eptu lam chuan Maduro kaihhruai sorkar thar hi an pawm lo tih sawiin, January 23 khan eptu hruaitu leh National Assembly-a hotu, Juan Guaido chu an ram interim president-ah a inpuang a, Guaido hi US leh ram ṭhenkhatten Venezuela ram hruaituah an pawm nghal a ni. Hei vang hian Maduro chuan US nena an inzawmna pawh a titawp nghal a, Venezuela Supreme Court chuan Guaido chu an ram a chhuahsan a khapsak bakah, a thil neihte pawh khawih chet theih lohin a hrensak nghal bawk. 

Maduro chuan eptu party-te chuan an ram inrelbawlnaa US inrawlhtir lo tur leh, an buaina chinfel dan ngaihtuah zawk turin a ti. Caracas-a mipui pungkhawmte hmaah Maduro chuan eptu hruaitu chu indo chawk chhuak zawnga thu sawi lo tur te, politics buaina sipai inrawlhtir tum lo turte in a ti.