Brexit vanga buaina a awm chuan Queen Elizabeth sawn chhuak dawn

European Union aṭanga Britain inlakhran hunah boruak ṭha lo leh harsatnate a thlen a, London-ah buaina a awm a nih chuan Queen Elizabeth leh lal chhungkaw member dangte chu hmun him lama sawnchhuah an nih theihna turin ruahmanna siam a ni. 

Hemi chungchang hi England chanchinbute chuan nimin khan an tarlang a, Cabinet office-a official pakhat chuan emergency evacuation plan hi Cold War lai aṭang khan a awm tawh a, heihi Brexit kalpui a nih hnuah tualchhunga harsatna a thleng a nih chuan hman leh a ni ang, a ti. Queen Elizabeth leh lal chhungkaw member dangte hi London pawn lam, hmun him lama sawnchhuahna turin ruahmanna hi siam a ni. 

Britain hi March 29-ah hian EU aṭangin a inlahrang tawh a, hetihlai hian EU aṭanga inlakchhuahna kalpui dan tura Prime Minister Theresa May-i leh EU hruaituten inremna, Withdrawal Agreement an siam chu Britain MP-ten an hnawlsak a ni. PM hian Parliament-ah Brexit deal chungchang hi sawipui leh a tum a, hetihlai hian inremna mumal tak awm loa EU aṭanga a inlakchhuah pawh a ngai maithei nia sawi.