Pakistan-in China-ah sabengtung thawn dawn

Pakistan chuan China ramah sabengtung a thawn lut dawn. Pakistan hi khawvela sabengtung tamna ram pathumna a ni a, sabengtung hi maktaduai nga chuang an awm a ni. 

China-ah hian sabengtung hi an hmang ṭangkaiin a to hle a, a vunte hi China damdawi siamna atante hman ṭhin a ni. He damdawi hi thisen tihchakna leh natna dotu tihchakna atanate an hmang ṭhin. 

Khyber Pakhtunkhwa province-a livestock department official chuan China company-te chuan Pakistan-a sabengtung vulhna hmunte chu an ngaihven hle a, foreign company-te hian US dollar tluklehdingawn thum vel invest pawh an inhuam niin a sawi. Pakistan hian a thawh khatna atan kum thum chhungin China-ah hian sabengtung 80,000 thawn a tum a ni. 

Hetihlai hian China chuan a ṭhianṭha, Pakistan ram ṭanpuina tur hian loan, US dollar tluklehdingawn 2.5 a puktir dawn tih a sawi. Pakistan hian sum lamah harsatna nasa tak a tawk mek a, a hmaa a lo puktir tawh nen sorkar kum kal meka China-in a puktir tur hi dollar tluklehdingawn 4.5 a tling dawn a ni. Tunhma lam pawhin Pakistan-in sum lama harsatna a tawh pawhin China hi a puitu lian ber a lo ni tawh ṭhin. Pakistan Prime Minister thar Imran Khan pawhin thuneihna a chan hnuah, emergency loan ruahman sak dan tur sawipuiin China, Saudia Arabia leh UAE-te pawh a lo tlawh tawh bawk.