Covid-19 laka inven nan US sorkarin Congress-ah USD tld 2.5 a dil

United States president Donald Trump kaihhruai sorkar chuan Covid-19 hri a darh zel loh nana invenna tur atan US dollar tluklehdingawn 2.5 chu  an mamawh tih Congress-ah a thlen tih White House chuan a tarlang. 

Trump kaihhruai sorkarin pawisa a dil zinga US dollar tld 1.5 chu hri danna laka invenna tur, vaccine siam chhuah nana mamawh a nih thu Congress-ah a thlen bakah, hmaikawr (mask), therapeutic leh thil dang ṭul atana hman tura tih a ni bawk.

White House Office of Management and Budget thupuangtu Rachel Semmel chuan he hri hi a darh zel avangin sorkar chuan tih tak zeta a ngaihven a ngai tawh a ni, a ti. Congress-a US dollar tld 2.5 an dil chungchang pawh sawi langin, heng pawisate hi khawvelina a buaipui mek Covid 19 hri leng darh zel tur venna tur atana tih a ni a, pawisate hi a ṭulna hmun hmuna hman theih tura ruahman a nih thu a sawi.

US-ah hian Covid-19 hri kai hi mi 53 an awm tawh tih US Centers for Disease Con­trol chuan a tarlang a, mah se vanneih thlak takin thi erawh an la awm lo nia sawi a ni bawk. Covid-19 darh ṭanna ram China anga nasa taka buaipui ngai la ni lo mah se, US-ah hian a inven lawkna leh lo inhmakhua dan nasa taka ngaihtuah a ṭul thu health official-te chuan thuchhuah an siam. 

Thawhṭanni khan US Centers for Disease Control chuan South Korea-a zin lo turin US-a cheng mi leh sa te chu a hriattir. A hriattir chhan hi China tih lohah South Korea chu Covid-19 kai tam berna ram a nih vang a ni. "Tunah chuan kan theihtawpa kan inven a ngai ta," tiin White House thupuangtu Hogan Gidley chuan Covid 19 laka inven nasat a ṭul zia a sawi.

South Korea ramah hian he hri leng vang hian mi 10 an thi tawh a, a hri kai zat finfiah tawh hi mi 977 an tling tawh bawk. 

Italy-a Covid-19 vanga thi mi 7 leh he hri kai mi 220 an awm tih hriatchhuah a nih hnuah, World Health Organization (WHO)-a expert team leh European Center for Disease Prevention and Control (ECDC)-te chu Italy dinhmun zirchiang turin an kal. 

Thawhṭannni khan WHO chuan thuchhuah siamin, Italy-a expert team an tirhluhte hian Covid-19 darh dan an zir chian dawn thu leh, he hri kaite tana damdawi ṭul te leh a theih ang anga inven dan turte chu an hrilh hriat nghal dawn thu an thu­chhuah siamah hian an tarlang tel. 

February 21 aṭang khan Italy-ah hian he hri hi a darh chak chho ṭan nia sawi a ni a, a bik takin Italy hmarchhak lam, Lombardy leh Venet-te chu he hri kai vei tamna khuate an ni.   

Coronavirus tia kan hriat lar a hnua Covid-19 tia WHO-in a hming a vuah tak hri  leng mek hi khawvel ram 29-ah a darh tawh a, China pawnah hian he hri kai thar hi mi 2069 an awm bakah, he hri vanga thi hi mi 23 an awm thu WHO chuan a tarlang.  

China National Health Commission chuan Covid-19 vanga thi hi nimin thleng khan China-ah mi 2,663 an awm tih a tarlang. Nimin bik khan China huamchhungah he hri vanga mi 71 an thih thu tarlangin, hei hi kar hnih chhunga ni khata he hri vanga thihna thleng a tlem ber ṭum a ni.

Covid-19 vanga thihna thleng  a tlakhniam rual hian he hri kai thar hi mi 508-an awm thu National Health Commission chuan a tarlang tel. 

WHO chief Tedros Adhanom Ghebreyesus chuan China-ah hian hri kai zat hi January 23 aṭanga February 2 khan zawimuanga a tlak hniam thu sawiin, hemi rual hian China dinhmun chu buaipui a la ngai hle tih a sawi nghal bawk.