Pentagon-in US-Mexico border-ah sipai 3,750 dah belh

Pentagon chuan US-Mexico ramri-ah border agent-te pui turin sipai 3,750 dahbelh an nih thu Pathianni khan a sawi. 

Ramri veng tura sipai dah belhte nen hian US Customs and Border Protection agent-te pui tura sipai dah zat hi 4,350 an tling a ni. Pentagon thuchhuah chuan heng sipaite hi thla thum chhung atana dah an ni tih sawiin, an ram chhim lam ramri himna tur hian sipaite dinhmun pawh a ṭul anga an ennawn zel tur thu a sawi. 

Hetihlai hian US roreltute chuan hun rei tak chhung sorkar khar, shutdown a ngaih phahna, border security funding chungchangah inremna siam a nih theihna turin inbiak dan kawng an la zawng mek bawk.  President Donald Trump-an US-Mexico ramri hungna bang siamna tura a sum phut chu Democrats lamin an pawmpui thei lo a, funding chungchanga an inrem theih loh vang hian  nikum December 22 aṭang khan sorkar chu hnathawk mumal thei loin shutdown a nih phah a ni. He shutdown hi kumin January 25-ah tihtawp a ni chauh a, US chanchina sorkar shutdown a nih rei ber ṭum a ni. 

Border security chungchangah White House leh Democrats lam hian February 15 thlenga inremna an siam theih loh chuan President chuan sorkar shutdown lehah a vau a, a nih loh pawhin ramri  hungna bang siamna tur sum a hmuh theihna tura national emergency puanah a vau a ni.