Venezuela : Pawl pahnih ten kawng an zawh

Venezuela khawpui, Caracas-ah Pathianni khan President Nicolas Maduro leh interim president-a inpuang, eptu hruaitu Juan Guaido thlawptuten kawng an zawh.

 

Juan Guaido hian January thla khan Vene-zuela acting president-ah a inpuang a, US  leh Latin America ram eng emaw zatin Guaido hi hruaitu atan an pawm nghal a ni. Hetihlai hian Maduro chuan Venezuela ram president dik tak leh awmchhun a nih thu a sawi thung.  Maduro hi Russia leh China-in an thlawp ve thung a ni. 

Caracas-a eptu pung-khawmte hmaah Guaido chuan Maduro-a president a nih dan chu dan kalh a nih vangin an ram danpui pawhin acting president dinhmun a chelh hi a remti tih a sawi. Eptu pawlten an duh ang ram zalenna an hmuh hma chuan lungawi lohna lantir chhunzawm zel an tum tih a sawi. Civil leh sipai official-te chu an hmalakna thlawp tura ngenin, Venezuela ram dinthar turin mawhphurhna pawimawh tak an nei tih a sawi. 

Hetihlai hian President Maduro thlawptute pawh Caracas-ah hian pung khawmin, socialist leader Huga Chavez-an thuneihna a chan champha vawi 20 pualin hun an hmang. Maduro chuan international media-te chuan eptu lam thiltih chauh an ngaihven a, sorkar thlawptu lam thiltih erawh an ngaihsak duh lo niin a sawi.

Sorkar thlawptu lam leh eptu pawlten kawngzawh an huaihawt hma lawk hian high-ranking Air Force general chuan online-a video a dahah Guaido a thlawp thu a sawi. General Francisco Yanez chuan sipai dangte pawh a hnung zui tur hian a sawm nghal bawk.