Israel-in Gaza ramri hungna thar siam ṭan

Israel chuan Gaza Strip aṭanga Israel rama Palestinian mi lutru ṭhinte venna turin ramri hungna, metre ruk-a sangin a siam ṭan tih Prime Minister Benjamin Netanyahu chuan a sawi. 

PM Netanyahu chuan Pathianni-a cabinet meeting neih dawna chanchin thar lakhawmtute a kawmnaah kar kalta kartawp lam aṭang khan Gaza ramri hunga siam hna hi thawh ṭan a nih thu a sawi. He daidanna siam hi lei aṭanga teha meter ruka sang niin, ramri tluanin siam tum a ni a, kumin chhungin zawhfel hman an tum a ni. Hemi hma hian Israel chuan Gaza ramriah hian leihnuai lamah daidanna siam hna a lo thawk ṭan tawh a, hei hi Palestinian helten Israel rama luhrukna tura lei an verh ṭhin venna tura a tih a ni. 

Israel hian Palestinian ram a luah, West Bank leh Jerusalem khawpui daidanna tur concrete bang a lo siam tawh a, hei bakah hian Egypt, Jordan, Lebabon leh Golan Heights ramri hungna pawh a siam tawh bawk.