CAR sorkar leh helpawl 14-ten inremna siam remti

Central African Re-public (CAR) sorkar chuan helpawl 14 aiawhte chu Sudan-ah inbiakna neihpuiin, inremna siam an remti. Inremna hi Bangui-ah ziahfel a ni thuai dawn tih an sawi. 

CAR-a UN mission, Minusca leh African Union (AU) chuan Sudan khawpui Khartoum-a CAR sorkar leh helpawl aiawhte inbiakna hi huaihawtin, inremna siam an remtih thu pawh an sawi nghal a ni. AU Commssioner Smail Chergui chuan CAR leh a ram mipuite tana thu lawmawm tak a nih thu a tarlang. 

Sorkar leh helpawl aiawhten inremna an siam dan kimchang hi puanzar a ni lo. A hmaa inremna an lo siam tawhte chu a lo hlawhchham tawh a ni. 

Kum1960 khan CAR hi France aṭangin a indang a, a ram chhung dinhmun hi an la sawhnghet lo hle. Kum 2013-a Muslim helpawl, Seleka tihten Kristian tamna rama thuneihna an chhuhsak hnu khan tualchhung buaina an la tawk chho reng a, Muslim helpawlte bei let tur hian Kristian helpawl, anti-Balaka tihte chu din chhoh an ni bawk. 

Tualchhung buaina leh tharum thawhna thleng vang hian mi sang tel thah an ni tawh a, mi maktaduai khat chuang an tlanchhia a, an zing mi nuai nga chuang chu ram pawn lamah an tlanchhia a ni. CAR-ah hian UN mission Minusca hnuaiah muanna sipai 13,000 vel dah mek niin, heng sipaite dahna senso atan hian kumtin dollar maktaduai 900 dawn sen ṭhin a ni.