US-in WHO hnenah USD mtd 200 chuang pe dawn

United States Secretary of State Antony Blinken chuan an ramin tun thla tawp hian World Health Organization (WHO) hnenah US dollar maktaduai 200 chuang a pe dawn tih a sawi.

Blinken chuan ram hrang hrangte inlungrual taka thawhhona lama ke penna chu US chuan a thlawp hle tih a sawi a, "United Nations leh World Health Organization chu Covid-19 dona kawnga ke pentu ber leh mihring te chhawmdawl hna thawk tu ber pawl lian tak pahnih ni mah se, khawvela hriselna a awm theih nana hma la tu leh kan hma lam huna kan himna ngaihtuahtu an ni tel a ni," tiin Nilainia UN Security Council member ram te nena online meeting an neihnaah a sawi a ni.

US secretary chuan ram zawng zawngte mawhphurhna chu mihring dikna chanvo pek a ni tiin, eng ram mah hian Covid-19 hi chhuanlamin mihring dikna chanvo rahbehsak loh tur, tiin a sawi bawk. Online meeting an neihnaah secretary hian US-in WHO hnena pawisa a pek tur chu ruahman fel vek a nih tawh thu a tichiang. 

Nikum khan US president kalchhuak ta Donald Trump kaihhruai US sorkar chuan kumin July 6-ah WHO member a nihna aṭanga inhnuhdawh a lo tum tawh a, mahse US president thar Joe Biden kaihhruai US sorkar chuan a rawn sut ta a ni.

WHO member aṭanga US inhnuhdawh a tum chhan hi Covid-19 hri leng chungchanga WHO hmalakna chu mawhphurhna hlen loh leh China thu thua awm nia a puh vang a ni. President hlui Donald Trump chuan WHO chu China uite tiin a lo sawi fo tawh bawk. 

US hi WHO donor lian ber a ni a, kum 2019 khan agency tan hian US dollar maktaduai 400 chuang a pe a, hei hi WHO budget aṭanga 15% dawn a tling pha a ni. Nikuma WHO-a donor lian US chet dan hi hri len tanṭirh lai a ni a, Trump kaihhruai sorkar chuan sawisel zuitu pawh a ngah hle a ni.