Israel PM leh Biden a vawi khatna atan inbia

US president Joe Biden chu President a nih hnuah a vawi khatna atan Israel prime minister Benjamin Netanyahu nen Nilaini khan phone call hmangin an inbia.

Phone hmanga an inbiaknaah hian Iran leh tualchhung chungchang an sawi dun a, US leh Israel inlaichinnate pawh an sawi dun bawk. Hei bakah hian tunhnaia Israel-in inremna a ziahpui tak United Arab Emirates (UAE) leh Bahrain chungchangte pawh an sawi dun bawk a ni. 

Joe Biden hian President a nih hnuah Netanyahu hi Middle East rama hruaitute zinga a biak hmasak ber a ni. White House-ina a tarlan dan chuan ram pahnih hruaitute hian defence lama thawh dunna tur te pawh an sawi a, Covid-19 hri leng mek do dan tur te pawh an sawi dun niin a tarlang bawk.

President Biden hian a thlak tak, president hlui Trump thutlukna lo siam tawh eng emaw zat chu a sut tawh a,  Iran nuclear deal aṭang Trump-a hun laia US lo inhnuhdawh tawh pawh a sut leh dawn nia sawi a ni. He inremna siam hi Israel chuan a duh lo hle a, kum 2018 khan US chu a lo inhnukdawh tawh a ni. Biden-a hnuaiah US hian Iran nuclear deal hi a zawm leh dawn nia sawi ni mah se, Trump-a'n Israel khawpui atana Jerusalem pawm a, Tel Aviv-a aṭanga Jerusalem-a US embassy a sawn erawh chu thlak danglam a tum lo nia sawi a ni. 

Biden hian Trump hmalaknaa Israel-in Bahrain, United Arab Emirates, Suddan leh Morroco ramte thawhpuina tur inremna a siampui pawh a thlawp bawk. Inremna an siama US tihtur sawite pawh an enchiang dawn tih an sawi.