Italy PM tharin Senate-ah fiahna a paltlang

Italy prime minister thar Mario Draghi chuan Nilaini khan senate-ah fiahna, confidence vote a paltlang a, amah duhtu lamah vote 262 a tla.

Nilainia Senate-a vote lakah hian pahnihin vote an thlak lo a, Draghi duh lotu lamah vote 40 a tla ve bawk. Kar liam ta Inrinnia lakluh tak Italy PM thar Mario Draghi hian lower house-ah vote of confidence a paltlang leh a ngai bawk a ni.

PM thar Draghi hian a kaihhruai sorkar chuan hri leng vanga an ram economy tlahniam mekin ngai a awh leh thuai theihna tur te, education, healthcare, justice, labor, leh tax reform te a ngaih pawimawh hmasak tur thu a sawi a,  heng bakah hian sik leh sa inthlak chungchanga hmalakna tur hrang hrangte leh sustainable growth chungchang chu a kaihhruai sorkar chuan a ngai pawimawh dawn niin a sawi bawk.

Nikum July thlaa Italy-in hri leng vanga an ram economy siamṭhat nana European Recovery Fund aṭanga grant leh loan hmanga Euro tluklehdingawn 209 lai an lak chu PM thar hian a ṭangkai thei ang bera hman a tum thu pawh a sawi bawk a ni.